· જંગલની રાત

૧

ક્યાંકથી આવી બેસી જાય

સાંગોપાંગ નિતરતી

લથબથ

પછી ધીરે ધીરે

કોરી કટ કરી નાખે

વેરવિખેર રાતને

સંકેલી ભીતર દબાવી દે

ક્યારેક ઝબૂક

ક્યારેક ઝબકારો

ફરી અલોપ

ચૂપચાપ સરકતી જાય

લથબથ

જંગલની રાત 

· તળાવ

છલોછલ ભર્યું હોય

અથવા ખાલીખમ

આ તળાવ

સાચા મોતીનો ચારો ચરતા ન હોય હંસ

તો ય તળાવની પાળ હોય અકબંધ

પાણીનું સ્મરણ

સાચવી રાખ્યું છે

જીવન મરણ વચ્ચે

તળાવમાં.

વેરાન પટમાં

ચીસ પાડું

દટાઈ જાય

તિરાડોમાં અવાજ.

પાળ પર નથી રોમાંચ

          નથી વૃક્ષ

                કલરવ

                પગરવ

તળાવમાં કશું નથી

નર્યો તપ્ત સુનકાર

પાળ પર ઊભો રહી

તાકી રહું

મારી આંખમાં

વિસ્તરતું રહે

એક...............