ચમકાર

આંખમાં ચમકારો થાય છે

ઘેરી વળે છે અંધકાર

અધ બીડેલાં પોપચાં

પાંપણમાં પોયણી

હલ્યા કરે ભવાં

ઉપર તળે

ચકળવકળ ઊડાઊડ કરતી કીકીઓ

અંધારે આથડે

સ્થિર દીવાની જ્યોત

ટપકતું પાણી

પટપટતી પાંપણ

અંધકાર ચીરતી

ઓગળે

પરિચય પ્રગટે ટેરવે

આંખના ઝુમ્મરો ઝૂલતાં

જ્યોતને ઝીલતાં

અંધકાર ઓળંગતાં

સ્તબ્ધતાથી જોયા કરે

એક પછી એક પ્રગટતા

ચમકારને 

• બીચ પર

ભીની રેતમાં પગલાં પાડું

મોજાંઓ ફરી વળે

ફરી પગલાં

રચાય અવનવી આકૃતિઓ

ઉર્વશી, મેનકા, રંભા

મોજાંઓ ફરી વળે

જાંઘ પરથી સરકતું પાણી

સેળભેળ કરી નાંખે

ઉર્વશી, મેનકા, રંભાને

ઉછળતાં પાણી સામે

માથે નાના બાળકો

તણાતું ઘર, દેરી બચાવવા

જાંઘ પરનું સરકતું પાણી

ઘૂસી જાય ઘરમાં

તૂટી જાય દેરી

ફરી એજ મથામણ

નવા ઘટ ઘડવાની

અનાવૃત અપ્સરાને

જોયા કરે આંખો

ફરી વળે પાણી પડળમાં

બદલાય કલેવર

દૂર સૂર્ય ડૂબે

ભીનાં પગલાં

ફરી ફરી

આકૃતિમાં શોધે

પડળના પાણી

રંભાને