હવે

 

●       હવે

 

રોજ ધણધણી ઊઠે છે આ શહેર

એકધારા થતાં બૉમ્બ વિસ્ફોટથી

મારા બાળપણના આકાશમાં

ચિચિયારી કરતા ઊડે છે વિમાનો

ક્યાં પડ્યો ? આજે ? બૉમ્બ ?

કુતુહલ ભર્યું આકાશ ધુમાડિયું થઇ ગયું છે

ધૂંધળી હવામાં ફફડે છે અખબાર

ઘવાયેલું બાળક પિતાની ગોદમાં પોઢી ગયું છે

ધૂળિયા રસ્તે દોડતી ટેન્ક વચ્ચેથી રસ્તો કાઢતી શેરીના નાકે

બંદૂકના તાકતા નાળચા

જેટ સ્પીડે ધેરી વળતી વેદના

અંદર અંદર ગૂંચળું વળીને પડી છે

રાતના આકાશમાં ફાઈટર જેટના શેરડાં વચ્ચે

દૂર પર્વત પાછળ દેખાય છે ધુમાડિયો ચંદ્ર

કબ્રસ્તાનમાં ઝાંખા ફાનસ ફરી રહ્યાં છે

હવે તે ગણી શકાય તેમ નથી.

હવે કદાચ આવતીકાલે

એક ફાનસ ઓછું હશે.

 

(સીરિયાના ઘોટ પર થયેલા બોમ્બમારામાં ઘવાયેલા બાળકની તસ્વીર જોયા પછી)