• જંગલ-૩

ગડમથલમાં રહેવું નહિ

વાળમાં આંગળીઓ ફેરવવી નહિ

દાઢી પસવારી

તૈયાર થા સિસિફસ !

કાળમીંઢ પથ્થરો જ નથી

ક્યાંક સાથોસાથ

ગોરાડું માટી ય છે

વરસાદે ફસકી જાય અને

આસપાસ ઊગી નીકળે તામ્બાવરણી

તને ગમે તેવી

નિશાની રૂપે પથ્થરો પર

લીટાઓ દોરીને યાદ રાખી શકાય તેવી

લાલ અને ગોરાડું

પડકાર ફેંકીને ય

ઝીલવાની કેવી મજા છે સિસિફસ ?

ચાલ !

ઢોળાવની ચિંતા વગર

દોડવ્યા કરીએ પડકારને

ઝીલી લઈએ

વરસાદ, પંખીઓ અને એનાં ગાનને

ચઢાવને

ઉતારને

નદી-કોતર-કેડી

ને

નીરવ સ્તબ્ધતાને

     ***